Psalm 6

Do Not Rebuke Me in Your Anger

¹In finem, in carminibus. Psalmus David. Pro octava. Domine, ne in furore tuo arguas me, neque in ira tua corripias me.

²Miserere mei, Domine, quoniam infirmus sum; sana me, Domine, quoniam conturbata sunt ossa mea.

³Et anima mea turbata est valde; sed tu, Domine, usquequo?

⁴Convertere, Domine, et eripe animam meam; salvum me fac propter misericordiam tuam.

⁵Quoniam non est in morte qui memor sit tui; in inferno autem quis confitebitur tibi?

⁶Laboravi in gemitu meo; lavabo per singulas noctes lectum meum: lacrimis meis stratum meum rigabo.

⁷Turbatus est a furore oculus meus; inveteravi inter omnes inimicos meos.

⁸Discedite a me omnes qui operamini iniquitatem, quoniam exaudivit Dominus vocem fletus mei.

⁹Exaudivit Dominus deprecationem meam; Dominus orationem meam suscepit.

¹⁰Erubescant, et conturbentur vehementer, omnes inimici mei; convertantur, et erubescant valde velociter.